محمد وأمثاله كثيرون…ليسوا في حاجة الى عطفكم ولا الى ”جيماتكم” هم في حاجة الى توزيع عادل للثروة

حسيمة سيتي
فيسبوكيات
حسيمة سيتي29 نوفمبر 2021
محمد وأمثاله كثيرون…ليسوا في حاجة الى عطفكم ولا الى ”جيماتكم” هم في حاجة الى توزيع عادل للثروة

اللي شاف فهاد الصورة تامغرابيت وعجباتو هاد الحالة اللي عايش هاد السيد وولادو وواليديه فهو إنسان غير سوي، بالنسبة ليا ماتفاجأش لأن عندنا فالبلاد هاد الناس منهوم عدااااد ومكنشوفوهوم غير من راس السيمانة لراس السيمانة حيت كايجيو للسوق الاسبوعي نهار الاثنين وفالعشية كايرجعو للجبال بالبغال وسط الشتا والثلج والبرد وساكنين فالخيام وفالكهوف…

دابا نتا مغربي يعجبك تشوف خوك مغربي تايضرب السوايع باش يوصل بالحمار ديالو لكهف تحت الجبل ويعطي الماكلة للواليد ديالو اللي كالس تما تايرعى الغنم وشنو هي هاد الماكلة؟ سردينة وخبزة وبطاطا ورمانة !! وبيدو ديال الما مانعرف منين عمرو؟؟!!! هادي حالة يبارطاجيها بنادم ويتباها بيها؟؟

تعيا ماتقول ليا حنا ناس الجود والكرم، هادي مافيهاش نقاش ولكن الانسان يقدر يكون كريم وفيه الجود أيضا الى عندو طريق معبدة وعندو المدرسة والما والضو والسبيطار والريزو حداه… دابا هاد المواطن مسكين باش كايعاون بلادو أشنو القيمة المضافة اللي كايزيد فالناتج الداخلي ديال المغرب؟ غادي تقول ليا كايبيع الغنم!! واخا أسيدي، عندو عشرين راس ولا ربعين ولا مية كايسهر عليهوم الليل ويبات فالثلج والشتا والبرد ويمرض وبيقى بالجوع ويعرض حياتو للخطر ويضيع ساعات من التنقل بالحمار باش فالاخير يبيع جزء من ديك الكسيبة بثمن ديال الله يحسن العوان اقل بكثير من داك المجهود اللي ضرب العام كامل او أعوااااام عديدة، علما أنه مكايستافد لا من الشعير المدعم ولا التبن ولا الفصة ولا هم يحزنون غير الشيح والريح فالجبل والما فالعوينة صااافي هادشي باش معيش بهايمو…

هاد السيد اللي شفتو اليوم راه الحياة ديالو كاتقطع فالقلب وادا كان الفيديو ديالو مع دوك السائحتين هو اللي غايجيب لينا التوريست غير بناقص شكرااا… لأن هادشي كايزيد يرسخ مقولة “المغرب يسير بسرعتين” سرعة ديال بناء ممر تحت أرضي بين الرباط وسلا،،، والسرعة اللي غادي بيها داك السيد مسكين فوق حمارو النهار كامل باش يوصل من الجبل للدوار.. شوفو على معادلة كيف دايرة..

فين هو الضرر اذا هاد الناس دعمتوهوم بالعلف والزيارات البيطرية وقربتو ليهوم المدارس والسبيطارات، ماشي دوك السبيطارات اللي على بالكوم وانما على الاقل يجي توريست لديك البلاصة ويدو مجروحة ويلقى بيطادين وأشنو فيها الى صاوبتو لهاد الناس الطريق ويتوفر فيها الطرونسبور والريزو ديال التيليفون باش اللي عضاتو غير لفعة يعيط لسيدي ربي وأهم من هادشي كامل كون داك السيد كان قاري وعندو مستوى دراسي حتى للاعدادي ولا الثانوي يقدر يدير حاجة أخرى فحياتو او على الاقل يتخلى على النمط البدائي في تربية المواشي… واش شفتو فين ساكن؟؟ راه العصر الحجري أعباد الله هاداك ومكاين حتى فرق بينو وبين داك انسان جبل ايغود اللي لقاو البقايا ديالو فنواحي اسفي…

شريف بلمصطفى

رابط مختصر

تعليقك يهمنا

نستخدم ملفات الكوكيز لنسهل عليك استخدام موقعنا الإلكتروني ونكيف المحتوى والإعلانات وفقا لمتطلباتك واحتياجاتك الخاصة، لتوفير ميزات وسائل التواصل الاجتماعية ولتحليل حركة الزيارات لدينا...لمعرفة المزيد

موافق