واش فراسكم كثر من 75% من الشباب ليوم خدام بالحد الادنى للاجور او أقل يعني ماتيوصلوش 2500 درهم للشهر و هذا من سياسة المغرب الرشيدة !!
واش فراسكم الاغلبية الساحقة من البنات ماكاتقبلش تزوج بواحد الصالير تاعو اقل من 2500 درهم و تا 3000 درهم (إلا من رحم ربك) ؟؟
أي واحد عندو شوية ديال العقل غايعرف ان هاد المعادلة غير متكافئة و غاتخرجنا فطريق مسدود
هادشي بلا مانهضرو على الشباب العاطل ..
النتيجة 😏👇🏻
ليوم اخر الاحصائات كاتقول ان العنوسة تجاوزات 10 مليون عانس
تصور 10 مليون عانس و الشباب مالاقي جهد وكاين لتمشي لطريق الفساد حيث مقيوم عليه رخيص.
كارثة حقيقية كاتفاقم يوم بعد يوم و الحل في ايدين الجنس اللطيف لي خرجو عليهم المسلسلات كل وحدة كاتمنا العريس بحال البطل مهند وعندو شركة و طموبيل و تيلبس گلاص… و هادشي مستحيل ..أبلا مانهضرو علا واحد النوع لي بغات تزوج غير باش دير العرس و تبان قدام العائلة و صحباتها لي كنسميه أنا فهاد الوقت الهرس.
من حقك تحلمي و تتمناي تا الشاب راه تمنى و حلم و و و… و لكن مالقاش مجتمع ودولة لي تحقق ليه داكشي ..فماتطالبيهش تانتي بشي حويج ماعندوش ليهم جهد وتزيديه ثقل فوق ثقل … !!
حاولو تقلدو الغرب فشي حاجة زوينة ماكاين لا عرس لا دهاز لا دار لا طوموبيل ..كتلقاهم ساكنين أو كارين في دار 50 متر مربع و خالقين السعادة
ليوما ولينا كانشوفو حلم الزواج و تكوين اسرة بحال حلم الفوز بكأس العالم …
المصيبة ان داك الشاب يقدر مايتزوجش و تاحاجة ماغاتنقص منو و لكن كلمة الحنانة ( الأم ) كاتمزقو من الداخل فاش كاتقول ليك ” ماكرهتش اوليدي نشوف وليداتك قبل مانموت.
