Am wass-a n 27 mayu 1926…Mulay Muhand yessars resnah

حسيمة سيتي
أرشيف الريف
حسيمة سيتي28 مايو 2020
Am wass-a n 27 mayu 1926…Mulay Muhand yessars resnah

Am wass-a n 26 mayu 1926, Abdelkarim El Khattabi, Arrayes n Arripublik n Arrif, yenya x uyis ines zi Snada s djiret ad isellem ixef ines i Ifransisen, di lmehkama n Targist, rid i Ispunya ira yarezzun xes.

Zi yexd’er ghar Targist x tfawin n 27 mayu 1926, ghar 05:15 n ssbeh’, isellem ixef ines i Fransa zi yeqber raman i ixef ines d familiyya ines, deg ij n tebrat yuri tt s ufus ines, yessekk asent s ta3rabt ass n 25 mayu 1926.

Ruxen i yessars resnah ines, bdan ttekksen resnah i r3eskar n Arripublik n Arrif d imjahden Irifiyen, maca ij tarfiqt n Imjahden n Arrif i yesseggur, uwzir n girra n Arripublik n Arrif Ahmed Budra Aketcum, ugin ad ssarsen resnah. Qqimen ccaten aqartas di ljebha tgharbit n Arrif di Jbala d Accawen ar Yulyuz 1927.

Zeg imjahden n Arripublik n Arrif nned’ni ira akides ag Tarfiqt n Ahmed Budra i yugin ad ssarsen resnah : Muh Azdad Aketcum, Lem3ellem Mohamed Utemsaman n Ayt Dawed, d Ahmed Xriru Ajebli, d wattas n imjahden nnedni.
Muh Azdad ira yedjan d d argaz d ahimi, ira yesseggur tarfiqt n ikumunduten n Arripublik n Arrif minxef ira ur yetthekkim h’edd, ira gharsen Tirelli n tkessuyt n resnah war t ssrusin am djiret am uzir.

Muh Azdad i yettwassen s targazt ines, yemmut x Arrif idammen ines hman deg useggwas n 1927 deg Isenhajen n Ssrir ; Mohamed Utemsaman d Ahmed Xriru mmuten di x Tmurt n Arrif ubandu n Arripublik n Arrif di Jbala.

Yeqqim Rqayed Ahmed Budra Aketcum, awzir n girra n Arripublik n Arrif, yeqqim yeccat aqartas ag tarfiqt ines, arami t tt’fen Ispunya di Yulyuz zeg useggwas n 1927 ag imeddukar ines n resnah ; h’ebsent Ispunya ag imeddukar ines di Tegzirt n Tcafarinas, ar iseggwasen n tratin.

Abdelkrim El Khattabi, Arrayes n Arripublik n Arrif zi yessteslem i Ifransisen, yessars resnah ; awzir ines n girra yugi, yeqqim yeccat aqartas ag tarfiqt ines, yenna xes Abdelkrim i ij n ujurnalist d Afransis zi t wwin deg ugharrabu ag rwacun nnes ghar Tegzirt n la Réunion”

Yurat: Mohamed ayoubi

رابط مختصر

تعليقك يهمنا

نستخدم ملفات الكوكيز لنسهل عليك استخدام موقعنا الإلكتروني ونكيف المحتوى والإعلانات وفقا لمتطلباتك واحتياجاتك الخاصة، لتوفير ميزات وسائل التواصل الاجتماعية ولتحليل حركة الزيارات لدينا...لمعرفة المزيد

موافق