لقجع حضر جنازة والد اللاعب ”احتارن” لمنعه من اللعب لمنتخب هولاندا

فيسبوكيات
حسيمة سيتي11 أكتوبر 2019
لقجع حضر جنازة والد اللاعب ”احتارن” لمنعه من اللعب لمنتخب هولاندا
رابط مختصر

فوزي لقجع رئيس الجامعة ديال الكرة ومعه العامل ديال الحسيمة وشخصيات اخرى جاو للجنازة ديال مصطفى احاتارن الله ارحمو واجعل مثواه الجنة واللي هو والد الموهبة محمد امين ايحاتارن (لاعب عالمي قادم).

ناضوا نشروا الصور فمنبر رسمي، الهدف من كل هذا باش أثروا على اللاعب ايحاتارن نفسيا والعبوا ليه على العاطفة ديالو باللي حنا معك ومهتمين بك وبعائلتك ووو راه اسيادنا كون باه الله ارحمو لقى الخير فالمغرب كاع ميهرب منو وامشي لهولندا وكون راه مزال فالحسيمة وهاذ ولدو محمد امين ميلقى ميدير حتى هو وغاتسد البيبان فوجهو وغايخرج احتج كون راه مع الاسد الزفزافي ومن معه مضروب بشي باركة دالحبس عوض انه اولي موهبة كروية عالمية دابا تتخاطفوا عليه مع البلاد اللي كوناتو.

باش تعرفوا النفاق وهاذ المغاربة باغيينها باردة وساهلة ماهلة، واش تذكرتوا فاش عاد مات مؤخرا والد سفيان بوفال، الله ارحمو مسكين، ومات كذلك والد بوطيب وجد اشرف داري وبزاف، واش شفتوا شي واحد تما جاء من هاذ الجامعة وقف معهم ولا تكفل بشيء حاجة؟، هذوا غرضهم واحد انهم إيأثروا على اللاعب الشاب ايحاتارن، ابينوا ليه زعما انهم مهتمين به وواقفين جنبه فهاذ اللحظات الصعبة، غير على ميديوه لهولندا اللي نفقات عليه وسهرات على تطوره وكبراتو وقراتو وعلماتو، بقاو اتسابقوا راسلين ليه للدار فاوتريخت الهولندية بودربالة والنيبت وطارق نجم وكان عمهم المشجع الظلمي سبقهم لتما بايعاز من صحاب الحال.

هذه هي مصائب قوم عند قوم فوائد، وعندما تتحول الجنازة لوسيلة لاقناع لاعب بحمل قميص المنتخب.

هاذ فوزي لقجع ولات فيه غا البلبلة بزاف بدون نتيجة، ظاهرة صوتية فقط، هو اللي باع الوهم للمسؤولين وانصار الوداد الرياضي فاش قال ليهم وجدوا مزيان باش تربحوا الكأس دابا امام الترجي ووهمهم انه اللقاء غايتعاود وكلشي فرح وطمأن وهو غا طالقها تسرح، بقى اجرجر واغوت واحلف باغلظ الايمان ان الفرقة اللي مولاتش شركة متلعبش هاذ العام راكوم شفتوا النتيجة الدوري بدى ، قال ليهم الدوري غايبدى بتقنية الفيديو مشفنا والو، يعني طالقها تسرح على بنادم.

الفئات السنية تتحق نتائج كارثية (بحال العاب القوى مسكينة)، ولا حضور لها ما يعني لا تكوين لا عبو الريح، غايبقاو ديما عوالين على المدارس الاوروبية توجد ليهم وهوما اسرطوها سهلة الهضم، تيخرج المواطن المغربي مسكين ها اللي حارك ايما يوصل او ياكلو الحوت هاللي هرب بشيء طريقة كلها كيفاش هارب من هاذ الجحيم، حيث البلاد معطياه تا وزة وقاتلة ملايين الشباب نفسيا ومعنويا وماديا وكلشي تقريبا ضايع ومنين شي واحد تينجح برى تيبقاو عليه بلادك والوطنية والقميص وانت ديالنا، بلاد تتعترف غا باللي غاتحلب منو هو اللي ديالها اما اللي خصها تنفق عليه عاد تكونو معندهاش ليه الوقت.

راه ايحاتارن اقدر اختار المغرب وميعرفش اش اوقع ليه مستقبلا كما وقع لهاشم مستور اول ملعب مع الفريق الاول ديال ايس ميلان غير جاء عندنا طفاوه وهمشوه وساهم فداكشي ومنير الحمداوي مع ولد اللذينا ديال دي بوير اللي خرجها منو، هاهو نصير مزراوي كان فقمة عطاءه والمدرب تيخليه حفرة والعب درار، بينما اسامة الادريسي ومن بعد اخد ورد وفاش اختار المغرب مسكين معرف باش تبلى مرة العب جوج دقايق مرة مكاينش، مرة اكدموه اعطيوه ركلة الترجيح الاولى اللي نفسيا من اصعب مايكون المهم خليها على الله وصاف.

و وصل بهم الامر اتكفلوا بكل حاجة بحال زعما الا عائلة اللاعب مخصوصة وهو ولى اشد منحة المتوج بلقب الدوري غا فجوج سيمانات والله ازيدو، هذوا كلهم الاعيب ديالهم باش العبوا للاعب على العاملين النفسي والعاطفي حيث معندهمش حاجة اخرى باش اقنعوه، وكون غا عارف اش داير المخزن فالريف والحسيمة وواقف عن قرب على داكشي ولا اشوف غير القرية اللي تدفن فيها الاب ديالو وغياب اي حاجة عندها علاقة بالتنمية كيف مهمشين الريف والمغرب ككل وشاف شباب الريف الحسيمي لكرة القدم وهلم جرى وكيفاش الناس تتموت باش تهرب من هنا، راه اهرب جرية وحدى ميوقفش وميترددش فحمل قميص الطواحين للحظة.

أوعنا بلعيد

اترك رد

نستخدم ملفات الكوكيز لنسهل عليك استخدام موقعنا الإلكتروني ونكيف المحتوى والإعلانات وفقا لمتطلباتك واحتياجاتك الخاصة، لتوفير ميزات وسائل التواصل الاجتماعية ولتحليل حركة الزيارات لدينا...لمعرفة المزيد

موافق