الشرطة ترحل سائحا أمريكيا من الرباط لبني ملال بسبب لون بشرته مع عدد من مهاجري جنوب الصحراء

وطنية
حسيمة سيتي2 سبتمبر 2019
الشرطة  ترحل سائحا أمريكيا من الرباط لبني ملال بسبب لون بشرته مع عدد من مهاجري جنوب الصحراء
رابط مختصر

هذا اللي فالصورة ،شاب أمريكي سميتو Timothy Hucks ، مراسل صحفي لموقع insideArabia و مقيم منذ مدّة فالعاصمة المغربية الرباط و بالضبط فباب شالة.

نهار الخميس 21 مارس الماضي، خرج من الدار اللي كاري مع ديك الثمنية لاروب باش يمشي يتقدّى شي لعيبات للعشا و شي تقيوتات يجيب بيهم الفجر.

يالله فات الحومة ديالو بشي خمسة ميترو، وقف عليه بوليسي سيفيل هو و صاحبو و طلبوا منو الباسبور ديالو، جاوبو بأنه ما هازوش معاه حيت هو ساكن غا هنا و خرج غا يتقدّا.
فاش سوّلوه فين ساكن، نعّت ليهم بالتدقيق مقرّ السكن ديالو و مع ذلك ما إقتنعوش.

جبد ليهم البيرمي الأمريكي ديالو كان هازو معاه، ورّاه ليهم، شافوه ما فهموا فيه والو، قالوا ليه غادي تمشي معانا، مينطوه و هزّوه فالفاركونيط.

تيموتي هاكس ما فهم تا لعبة فاش لقا راسو وسط أكثر من ربعين إفريقي من دول جنوب الصحرا مخشيين فديك الفارغو.

دّاوه للكوميسارية، داز فالتحقيق و تطرحات عليه نفس الأسئلة، منين نتا، اش كدير هنا فالرباط، واحد من المحقّقين سوّلوا واش كتعرف دوي بالعربية، جاوبوا ب لا، شوّيا نقّز واحد أخور قال ليه نتا بانية إرهابي، قالوا ألا أشمن إرهابي، جابوا البوليسي باينة عليك من جماعة بوكو حرام، سكت لمّك.

من بعد ما داز فالتحقيق هو و الكليكة اللي جمعوا ديك الليلة، شارجاوهوم كاملين فالكار و شدّو بيهم الطريق لبني ملال، من بعد ثلاث ساعات كيلقا تيموتي هاكس راسو ملاوح فشوارع بني ملال، من بعد ما كان كيظنّ أنه غا يدّيوه للحبس.

جاب الله كانت عندو واحد المية درهم هي اللي كان خارج باش يتقدّا بيها، مشا كيجرّي لمحطة الكيران، قطع ورقة للرباط و شدّ الكار رجع فحالو.

من لي رجع للرباط ما خرجش من الدار، بقا مصدوم كيفاش المغاربة حكموا عليه أنه مهاجر سرّي، فقط من خلال البشرة و المظهر الخارجي ديالو.

صحابوا نصحوه يتصل بالسفارة الأمريكية فالرباط و يروّن دينمها، و يحضر فيها ترامب شخصيا، لكن هو فضّل يلتزم الصمت حتى يرجع فحالو سالم غانم.

من بعد ما وقعات ليه هاد الواقعة، تيموتي هاكس غا يخوي الرباط و غا يطلع فحالو لطنجة، فين غا يسكن فيها من ديك الوقت ليومنا هذا، فاش قرّر يرجع فحالو، غا يكتشف بأن بطاقة اللإقامة المؤقتة ديالو سالات من شحال هادي و ما إنتبهش ليها، و كيتعتبر دابا مقيم غير شرعي فالمغريب، و إلى قرّر يمشي للمطار باش يرجع غا يشدّوه.

عليها اليوم كتب على قصتو فالحساب ديالو على تويتر باش يلقاو ليه شي حل و يرجع للمريكان قبل ما يلقا راسو راجع عند داك البوليسي اللي قالوا نتا مسيفطاك بوكو حرام باش تبلبلها فلبلاد

اترك رد

نستخدم ملفات الكوكيز لنسهل عليك استخدام موقعنا الإلكتروني ونكيف المحتوى والإعلانات وفقا لمتطلباتك واحتياجاتك الخاصة، لتوفير ميزات وسائل التواصل الاجتماعية ولتحليل حركة الزيارات لدينا...لمعرفة المزيد

موافق