يحدث في المغرب… سجينة بسجن فاس تفارق الحياة بشكل مفاجئ وعائلتها تتلقى الخبر بعد 3 ايام من وفاتها عبر البريد

wait... مشاهدةآخر تحديث : الإثنين 13 مايو 2019 - 6:16 صباحًا

كانت عندي أخت الله يرحمها سجينة في سجن بوركايز فاس ماتت السيمانة اللي فاتت ربي يرحمها والمشكلة ملي مرضت إدارة السجن كاع ما اتصلوا بنا ولا علمونا باللي بنتنا مريضة داوها للطبيب وبقات تما 3 أيام والنهار الرابع ماتت كان نهار الثلاثاء وما اتصلوا بنا ما والو صفطونا برية للدار القديمة وصلت يوم الخميس يعني أختي ماتت الثلاثاء والرسالة وصلت الخميس غير الجيران اللي جابوها لينا وكاتبين فيها باللي بنتكم توفيت.

واش أعباد الله باقي شي زمان ديال الرسائل وحتى ايلا كان باقي واش الموت كيعلموا بها بالرسائل والمشكلة عندهم أرقام تلفوناتنا وعارفينا ما بقيناش فداك الحي.

دبا أخوتي احنا أختنا مشات الله يرحمها ولكن باقي بزاف ديال البنات فالسجن ممكن يوقع ليهم كيما وقع لاختي ولا أكثر دبا الله يجازيكم بالخير اللي كتعرف شي جمعية ففاس ولا شي هيئة قضائية نلتجأوا ليها باش تشوف هاد الكارثة اللي كتوقع فالسجون المغربية وتدافع على السجناء وترد ليهم الاعتبار راه ياما في السجن مظالم.

وماشي أي واحد ولا وحدة فالسجن راه ما مزيانش كل واحد وشنو كتب عليه الله.

كنقولها ونعاودها احنا بنتنا مشات ماغاديش ترجع ولكن بغينا رد الاعتبار لينا وبغينا هادشي ما يوقعش لعائلات أخرى ويوقع ليهم ما وقع لينا الله يجازيكم بخير لما تنصحونا شنو نديروا.

للأشارة احنا ما نقدوش على المحامي وطلع وهبط حيث ماعندناش الامكانيات المادية باش نتحركوا بغينا شي جمعية اللي تساعدنا مجانا الله يجازيكم بالخير.

أختي ما كانش مريضة وكنا كنزوروها باستمرار وأنا شخصيا كنت زرتها قبل الحدث غير بستة أيام ديت ليها الكتب حيث كانت غدوز البكالوريا فإذا بنا كنتفاجؤا بهاد الخبر اللي نزل علينا بحال الصاعقة.

من بريد الصفحة

2019-05-13 2019-05-13

اترك رد

زاوية التعليقات هي جزء مكمّل للموضوع الذي قرأته للتو. حاول أن تحصر تعليقك في صلب الموضوع حتى نستثمر هذا التعليق لكسب المزيد من الفائدة سواءً عن طريق مناقشة الموضوع أو عن طريق إضافة معلومات مكمّلة أو إبداء ملاحظات أخرى في نفس السياق.

حسيمة سيتي