أين الملك … ولماذا السؤال؟

wait... مشاهدةآخر تحديث : السبت 29 سبتمبر 2018 - 5:22 مساءً

المغرب عامين هادي وهو فحالة غير مستقرة من نهار تطحن محسن فكري وأخطأت الدولة في التعامل مع الحدث … واختارت المقاربة الأمنية والقمع والحصار والإعتقالات بدل تقلب على حلول ولو تكون غا وهمية وتطوي داك الملف …

من مورا محسن فكري جا الزفزافي لي ولات سمييتو كاتذكر اكثر من محسن فكري ولي رجع هو صحابو فحد ذاتهم قضية اخرى اكبر من ديال طحن محسن … الأحكام لي تصدرات فحقهم صدمات أعداء الحراك لي ماتفقوش مع ريافة قبل المتضامنين معهم … الشعب توصل برسالة مفادها أنك غاتدوي غاتضرب بعشرين عام.

وقبل من الأحكام ديال دراري د الريف … خرجوا الناس فزاكورة كايطالبوا بالماء ديال شريب لاشيء اخر غيره مابغاو لا حرية لا كرامة لا عدالة بغاو غايحييدو العطش … وتعاملت معهم الدولة بنفس الطريقه باش تعاملات مع حراك الريف القمع والإعتقالات… جا من موراهم حراك جرادة …. اختلفت مطالب المحتجين واساليب احتجههم الا أن تعامل الدولة معهم واحد المقاربة الأمنية هي سيدة الموقف … جاو كوارث اخرى بحال ديال 15 لمرا فالصويرة … لكن مروا مرور الكرام.

الا أن هد الاسبوع تجمعوا بمرة … فونطوم ولا اش داك العجب بان فمارتيل كايحرگ بنادم … الحراگة هازين شعار وخليونا نحرگو الشعب يريد اسقاط الجنسية … الإلترا ديال الرجاء … هزات شعار مابغيتونا نقراو … مابغيتونا نوعاو …باش تبقاو فينا تحكموا … وكذلك الإلترا ديال طنجة امكن هزو باش الى خواو المدرجات عرفي ولادك فالغربة … حي صفيحي على قدو خارج فعين السبع بالمدينة الإقتصادية الدار البيضاء هز شعار اسقاط الجنسية … الشعب ها هو الملك فينا هو … الجماهي التطوانية هزو فالتيران بالروح بالدم نفديك يا حياة …. والصفير الغوات ملي بدا النشيد الوطني قبيل الماتش … وبالليل هزو دراپو د سبليون والشعب يريد اسقاط الجنسية … اي أن الوعي بضرورة الإحتجاج مابقاش منحاصر على واحد الفئة قليلة لي قاريا وفاهمة هدشي غادي وكايمتاد …

الناس فالجنوب طاحت غا الشتاء ديال شتنبر الطرقان تسدو القناطر طاحوا وبنادم جاروا الواد … زيد عليها المقررات ديال الدريجة البغرير والبطبوطة قانون التحرش الجنسي شي حوايج كايشوفهوم المواطن البسيط بعاد كل البعد عن مشاكيلو الحقيقية لي هما الخبز والزيت والكراء والمال والضو والضريبة وبحال هد الخرجات والقرارات كايزيدو احقدوه ويحس بالصح بلي مكاينش لي مسوق بداكشي لي هامو هو … بالصح كانوا كايبانوا احداث ولكن مرة فشحال وبنادم كايغضب فالفاسبوك وكايعرف اش كايقول من شدة الخوف من السلطة … ولكن سرعان مكايطفى داك الغضب … هد الأواخير ولاو الكوارث واحد ملاصق مع لاخر .

ولات الفضيحة كاتنتشر بسرعة النار في التبن ومزال مكاتنساش حتى كاتبعها كارثة اخرى … ولا بنادم زاعم … كانت تطلقات واحد الحملة ولكن ماطولاتش دارو ليها هشتاغ 18 عام ماصدقتيش في إشارة للملك وبلي تمنطاش لسنة دوزتي فالحكم ولم يتحقق شيء … البارح بان تاني هشتاغ ديال اين الملك فيما يقع … اي أن القضية مابقاتش قضية لي دايرين به لي خايبين بدا بنادم كايصعد وكايقسح فالهضرة والهاجس ديال الخوف بدا كايتهرس … وهد الهاجس مابداش كايهرس غا هكذاك جا نتيجات صحاب اللايفات مول الكرسي مول الشكارة مول الكاسكيطة الصفحات لي كايخرجوا فالنظام والمسؤولين طول وعرض التليفون كلشي عندو المعلومة فيديه الحدث كايوصلك مباشر لحظة وقوعه … هدشي لي مخليين بنادم ازعم و هو اصلا كان فحالة اختناق ولا يقل حاله سول من داكشي لي كايشوف فالفاسبوك والوتساب وكايشوف راسو فأي لحظة ممكن اكون تا هو مكان هداك لي كايشوف فيه ففيديو منشور فوق الطروطوار قدام شي سبيطار ولا جات فيه قرطاسة وهو فمحاولة للهروب ولا اتطحن فكاميو د الزبل الإحساس بالحكرة كايخليه اكون قابل للإنفجار وزيد عليها فقدان الثقة من المؤسسات والمنتخبين لي هو اكبر كارثة … وبزاف ديال عوامل اخرى خلات الناس انهم اوليو اعبروا على لي ضارهوم ولو افتراضياً.

من صفحة موحماد مول الحانوت

2018-09-29 2018-09-29
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

زاوية التعليقات هي جزء مكمّل للموضوع الذي قرأته للتو. حاول أن تحصر تعليقك في صلب الموضوع حتى نستثمر هذا التعليق لكسب المزيد من الفائدة سواءً عن طريق مناقشة الموضوع أو عن طريق إضافة معلومات مكمّلة أو إبداء ملاحظات أخرى في نفس السياق.

حسيمة سيتي