شعار شباب الشمال: ”عاش الفانطوم ولا عاش من خانه”

wait... مشاهدةآخر تحديث : الإثنين 24 سبتمبر 2018 - 3:43 صباحًا

البارح في مرتيل الفانطوم ماهزت حتى واحد … الفانطوم هبطت حتى للحاشية و الشباب يالاه وصلو للما و كاين لي دخال في الما حتى للروكبة و قربو بزاااف باش يركبو في Goma لكن لامارين الموغرب جاو كايطيرو كايشوقو البحر و طالقين “سيرينا” و الفانطوم رجعت تم تم و قالو لديك الشباب “volvemos volvemos” يعني حنا راجعين.. صافي… الفانطوم رجعت فحالا كاطير كاطير شي سرعة خيالية و لامارين موراها…

في الكورنيش د مرتيل… ناضت الروينة تقربلت ناضت القيامة تماك … جاو البوليس و جاو القياد و المقدمية و DST و RG (جميع الأجهزة الأمنية و الاستخباراتية) جاو للكورنيش د مرتيل يشوفو هاد الروينة و يحاولو يشوفو شكون من مورا هادشي… يشوفو شكون تماك براني شكون كايتكلم بزاف في الموبيل… شكون كان حاضر و خوا السيكطور… يسجلو الماطريكولات د السيارات لي كانو واقفين تماك… المهم جاو عوالين يشوفو شكون المنسق د اسبانيول موالين الفانطوم في مرتيل !

شوية بشوية تجمهرو الناس و تعدلت وقفة احتجاجية من طرف الشباب لي بقاو في الرملة كايزفط فيهم البرد… وقفة احتجاجية فيها شي 150 واحد كاملين كايقولو بصوت واحد “الشعب يريد الحارگة فابور” !

Photo de ‎بارطاجي يا مواطن‎.

الشباب الأوائل لي وصلو للفانطوم و شافو هادشي هوما موالين الكرارس د السبول و غولال و الهيندي… واحد فيهم قال ”والله أنا الاول لي وصلت عندوم ما يكذب عليك حتى واحد أخويا والله ما مشى فيها شي واحد … قالي الفانطوم فيها النصارى و قالي عندوم 3 ديال المواطر.. قالي نفس الفانطوم د طنجة و نفس الاشخاص و نفس اللبسة لي عليهم… قالي ملي جاو لامارين ديانا قالونا حنا راجعين… عليها هاد الدراري بقاو قصارين هنايا… قالي النصارى قالو راجعين راه راجعين أخويا.. قالي والله حتى نسماح في دينمها هاد الكروسة و نمشي نشوف زهري… قلبو طايب و ساخط .. مشينا عند شاب اخور في كروصة اخرى كلينا عندو و كانجمعو المعلومات… عطانا المعلومات بزاف… واحد صاحبو مشكين مفزك كايقافقاف بالبرد قالنا نفس الكلام لي قال آخور… ماهازو حتى واحد و راهم راجعين !

Photo de Mounir El Yakoubi.
Photo de Mounir El Yakoubi.

شني كاين بالضبط ؟

خليني من الكلام الخاوي لي كايقول ان الاسبان جاو يهزو الشباب محتاجين في يد العاملة في الفلاحة… لو كانو محتاجين في ذلك يهزو غير لي في سبتة راه فايطة بالحراگا … الجزائريين و المغاربة معمرين سبتة… يهبطو ن playa benitis و benzu و يهزو البشر بلا مايجيو حتى لسيدي قنقوش و بليونش و الفنيدق و مرتيل … اذا كان خصوم يد العاملة علاش اعتقلو ديك المجموعة د سيدي قنقوش و سردوهوم للمغرب؟

شكون مورا هادشي ؟

شكون عطى هاد القوة لهاد  سبانيول باش يهبطو للحاشية د المغرب و يهزو البشر… علاش لامارين د المغرب  مايطلقوشي القرطاس على الفانطوم يغرقوها… شني كاين ؟ ..في 02:30 د الليل الكورنيش عااامر بالشباب مساكن كولشي كايستنى الفانطوم ترجاع باش تهوزوم للضفة الاخرى …

2018-09-24 2018-09-24

اترك رد

زاوية التعليقات هي جزء مكمّل للموضوع الذي قرأته للتو. حاول أن تحصر تعليقك في صلب الموضوع حتى نستثمر هذا التعليق لكسب المزيد من الفائدة سواءً عن طريق مناقشة الموضوع أو عن طريق إضافة معلومات مكمّلة أو إبداء ملاحظات أخرى في نفس السياق.

حسيمة سيتي