شكون هو سعد الدين العثماني رئيس الحكومة!

وطنية
حسيمة سيتي19 مارس 2017
شكون هو سعد الدين العثماني رئيس الحكومة!
رابط مختصر

عادل سبيكي

سعد الدين العثماني، 61 سنة، سوسي من تافراوت، كبر بين إنزگان و كازا، متزوّج من السيدة حليمة صغور و عندو ثلاثة دالوليدات، نجم الدين كيقرا لانفورماتيك فتركيا، خولة جالسة فالدار، و مروة باقي كتقرا.

سعد الدين كان قرّاي فصغرو، رغم الظروف القاسية دلقراية فتمازيرت،
خدا الباك علوم ف 1976 من ثانوية عبدالله بن ياسين فإنزگان، من مور الباك دار واحد التخليطة عجيبة غريبة، مشا قرا الطب فكازا، و الشريعة الإسلامية فأيت ملول، بغا يولي فقيه و طبيب فنفس الوقت.

خدا الإجازة فالشريعة الإسلامية ف 1983 و الدكتوراه فالطب العام ف 1986، من بعد خدا دبلوم التخصص فالطب النفسي ف 1994 من المركز الجامعي للطب النفسي فكازا.
سعد الدين من الناس لقلال و لا واقيلا هو الوحيد فالمغريب اللي ناقش رسالة الدكتوراه ديالو فالطب بالعربية.

الشريعة اللي قرا راه ألف بيها شي كتب و مؤلفات دينية، و الدبلوم اللي خدا هو باش خدّام بيه دابا و كبّر بيه وليداتو، من بعد ما فتح عيادة للطب النفسي فحسّان فالرباط، لكن الناس اللي عندهوم مشاكيل نفسية و مشاو عندو، قالو أنه كيبقا عليهم نتا خاصك غير تصلّي فالوقت و غا تولّي لاباس نشاعلاه، نتا غير بدا تقرا القرأن كل صباح و بإذن الله غا تشفى، و دوز لاكيص خلّص جازاك الله خيرا.

سعد الدين العثماني هو تلميذ عبد الكريم الخطيب و تربية يدّو، كبر فالجماعة الإسلامية و كان هو من الرباعة اللي أسسوا التوحيد و الإصلاح و من بعد العدالة و التنمية، بن كيران الرميد و الريسوني و الأخرون.

نقدرو نقولو على العثماني هو صوت العقل فالبيجيدي و الرجل الحكيم ديال بصاح، باها الله يرحمو كان غا ساكت وصافي ما حكيم ما والو، فتفجيرات 16 ماي 2003 كان القرار تخاد فدوائر القرار بحلّ حزب العدالة و التنمية لكن بفضل حنكة هاد الراجل و أدبه و تكوينه السياسي إستطع يكون أفضل محاور لوزارة الداخلية، و إستطع يعبر بحزب العدالة و التنمية لبرّ الأمان.

علاقتو ببن كيران ما عمّرها كانت مزيانة، لأن شخصية العثماني الهادئة و الطيبوبة ديالو و دماثة الأخلاق ديالو كانو كيخلعو بن كيران، و ما كانش حاملو، كان خايف يسحب منو الأضواء.

سعد الدين العثماني أسوأ وزير خارجية داز فالمغريب، ما ضربش فيها حتّ عامين كاملة، كون ما كانتش عشرين فبراير و تغيير الدستور ما عمّر كانت غا تعطا ديك الوزارة لسياسي متحزّب، وزارة الخارجية كانت ديما من الوزارات السيادية، و مع ذلك المليك ما خلاٌهش بوحدو جاب ليه جوج حضّايا، الطيب الفاسي الفهري كمستشار و يوسف العمراني كوزير منتدب فالخارجية.

و كيبقا أسوأ مشهد وقع ليه فاش جات هيلاري كلينطون للمغريب و مشا الفاسي الفهري هو اللي يستقبلها، و اللقطة ديال الجعفري مندوب سوريا فمجلس الأمن، و بلا منساو البريكولات ديال امريكا الجنوبية اللي كان كيمشي ليهم غير العمراني حيت كيتقن الاسبانية.

ف 2013 فالتعديل الحكومي من بعد ما خرج حزب الاستقلال من الحكومة، ضحّاو بيه مسكين و جابو بلاصتو الفعفعاني صلاح الدين مزوار.

سعد الدين العثماني رجل خجول مكيهضرش بزااف، ما عزيزش عليه الأضواء و الشهرة فحال بن كيران، فارض إحترامو و مكيحركش البيضة من بلاصتها، قلتي لو وقف يوقف ، جلس كيجلس، ما قاد على صداع، و على هادشي تعيّن البارح رئيس للحكومة.

سعد الدين العثماني عايش في ڤيلا فاخرة فحي السلام فسلا، حدا ڤيلا عبدالسلام ياسين ديال العدل و الإحسان، عندو عيادة فالرباط ديال الطب النفسي كيدوّز ب 400 درهم و خاصك تشد رونديڤو، و عندو مختبر للتحليلات الطبية فأيت ملول يحمل إسم مختبر العثماني و مقابلو ليه خوه، و راك عارف المختبرات شحال كيدخلو بلا منهضر.

سعد الدين العثماني فنهاية التسعينات كان كيقدم برنامج وقائع فدوزيم مع فضيلة أنور كمُحلل شخصيات المجرمين، بداك البرنامج تشهر و تروجات عندو القضية فالعيادة ديالو.

هو نائب برلماني من 1997 يعني من ديك الوقت و هو كيشد ربعة دلميون فالشهر، راجل ما فكرشوش لعجينة و مصادر الثروة ديالو معروفة، على المستوى الإنساني رائع و فمنتهى التخلق و الإحترام، سياسيا ضعيف بزااف و كون ما حزب العدالة و التنمية كون مات لو الحوت شحال هادي حيت ما عندوش ديك الكاريزما السياسية اللي يقدر يجيب بيها الأصوات.

سعد الدين كيهضر بالعربية و الفرنسية و والامازيغية

اترك رد

نستخدم ملفات الكوكيز لنسهل عليك استخدام موقعنا الإلكتروني ونكيف المحتوى والإعلانات وفقا لمتطلباتك واحتياجاتك الخاصة، لتوفير ميزات وسائل التواصل الاجتماعية ولتحليل حركة الزيارات لدينا...لمعرفة المزيد

موافق