رسالة الى كل من يختصر الوطنية في تشجيع فريق لكرة القدم

خميس بتكمنت

الكثير من لفهامية خرجوا اليوم مرددين اسطوانة مشروخة ” انا افرق بين السياسة و الرياضة ” ” مبروك الفرحة للشعب ” ، ومناسبة ذلك تأهل المنتخب المغربي ، و لكن أسي لفهايمي خصك تعرف أولا أن الاستحقاقات الرياضية ماشي من المؤشرات التي يتم الاعتماد في تصنيفات الرفاهية و التنمية بين الشعوب ، الى بصح كاتهمك فرحة الشعب قولينا مستوى و جودة الصحة و جودة التعليم و معدل الناتج الفردي للمواطن ويلا لقيتي بلي دخل الفرد تجاوز 8600 دولار ديك الساعة نضربو فالبندير كاملين ،ويلا لقيتي أن كل ألف نسمة عندهم طبيب صوط فالغيطة ويلا لقيتي ان جامعات لبلاد تصنف ضمن احسن مئة جامعة فرح مع راسك.

ثم مادام نتا كاتفرق بين الرياضة و السياسة راه فيك شي ديفو علاش ؟ لأنك لم تتساءل و تقارن بين نسبة انفاق جامعة كرة القدم الذي يقدر بالمليارات و بين الحصيلة و غاتلقا ان مبالغ مهمة تم هدرها و ان صفقات سمينة تم عقدها تحت الطاولة لأنها أجريت خارج المراقبة و المساءلة و المحاسبة كاتكون بأدوات سياسية و رقابة مؤسسات سياسية مهمتها الردع و السهر على حسن التسيير و لكن ضوماج فأنت كاتفصل اسي بين السياسة و الرياضة و ماعمرك سولتي شنو جاب بنسليمان لرئاسة الجامعة ملي ماكايناش سياسة تما و شنو جاب لقجع و علاش نجا أوزين من المحاسبة على صفقة الكراطة للي ربح فيها لملاير مادام نسيبتو هي حليمة العسالي ، أكيد ماغاتعرفش شكون هي العسالي لانك كاتفصل بين السياسة و الرياضة.

ثم أسي الوطني الكروي عمرك سولتي راسك واش بالصح كاينة سياسة كروية مادام المنتخب كايلعبو فيه لخوت للي تزادو فلخارج و تم تكوينهم في مدارس النوادي الاوربية بعدما هاجر آباؤهم هروبا من الفقر و مشاو لتما و لقاو تما النصارى عالجوهم و قراوهم حتى ولاو كاياكلو اغذية صحية و ماعندهمش فقر الدم بحالنا ، تصورتي شي نهار كن بقاو اباؤهم ماهاجروش واش غايكونو ولادهم لعابا ولا حمالين في لموقف ؟ شنو الجدوى من الجامعة ملي الموهوبين نقومو باستيرادهم من برا و كانحلفوهم براية الدولة للي هربو منها والديهم بحثا عن عمل و حياة اجمل ؟

واخا اسيدي فرح و الشعب خصو يفرح و لكن ماتنساش أنه بعد مونديال ميكسيكو تم ترويج إشاعة سياسية مفادها كن ربح المنتخب كاس لعالام كانت اثمنة المواد الاستهلاكية ستعرف انخفاضا حيت داك الكاس كايوزن شي 8 كيلو د الدهب و كنا غادي نصهرو الذهب و يتباع و داكشي للي غايتباع بيه غايساهمو بيه في خفض الزيت و السكر و الدقيق ، ها التحليلات د الشعب للي كاتقول عليه فرحان كيدايرا اسي لفاهم ، و مورها فمونديال امريكا بقاو الناس كايقولو كن طلعو للدور الثاني كانو غايخفضو درهم فالبوطا الصغيرة و 5 دورو فلكبيرة في حين انه فديك المرحلة كان البنك الدولي تدخل فالسياسة و فرض التقويم الهيكلي و موراها المخططات الخماسية ..

خلاها علي الخطابي للي لعب مع المنتخب و مشا فحالو عندما قال ” مايمكنش نلعب مع فريق كايدخلو الجنرالات والسياسيين فالتشكيلة ديالو ” حيت ولد فلان كايعجبو شيبو و بنت الجنرال فلان كاتفرح ملي كاتشوف فرتوت لاعب ….

و تانوووض ، الى نتا وطني سول غير شنو كايدير الزفزافي و رفاقه فالحبس مادام بغاو صبيطارات و مدارس و اقطاب صناعية ، يعني بغاو يفرح الشعب فرحة حقيقية و هانتا كاتشوف مصيرهم فين تلات بيهم ليام ، أما لفرحة للي كاتحيد التمل ديالها باللبن فصباح الاحد دايرة بحال ديك الفرحة دهاداك للي للي شارك فمسيرة ولد زروال و قال ملي سولوه ” انا فرحان حيت جيت لدالبيضا شارع نقي هنا و كمينا فلكار على خاطرنا و بغينا بنكيران يخرج من الصحرا ” …

loading...
2017-11-12 2017-11-12
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

زاوية التعليقات هي جزء مكمّل للموضوع الذي قرأته للتو. حاول أن تحصر تعليقك في صلب الموضوع حتى نستثمر هذا التعليق لكسب المزيد من الفائدة سواءً عن طريق مناقشة الموضوع أو عن طريق إضافة معلومات مكمّلة أو إبداء ملاحظات أخرى في نفس السياق.

التعليقاتتعليقان

  • ilyas

    انا فرحان حيت جيت لدالبيضا شارع نقي هنا و كمينا فلكار على خاطرنا و بغينا بنكيران يخرج من الصحرا ” … بيك يا وليدي على هدرة ديال العياشة

  • عبد اللطيف

    أسي الفهايمي انت لي خاصك تفهم، بان العفوية لا علاقة لها بالتجاذبات والآراء والنظريات والكتابات الوصولية والانتهازية والركوب على المآسي وغباء الآخرين. العفوية علاقتها بالوطنية فقط. أسي الفاهم

حسيمة سيتي