شفتي حنا فكازا ….عندنا مهرجان ديال البيرة.

Sobhi Boudih

“براسري دو ماروك” الموزع الأول للكحول بمملكة الشرفا أحفاد سيد النبي،كينظم بكازا مهرجان ديال البيرة. طبعا مغديش ندخلو فداك الموضوع المشبك ديال حنا دولة إسلامية والشراب حرام لان هاد الموضوع عمرنا غادي نساليوه. غير أنه بغينا نجبدو الفصول ديال القانون الجنائي والعقوبات اللي كيهدر عليها بخصوص التعاطي للمشروبات الكحولية والسكر العلني.

  قالك أسيدي القانون الجنائي ديالنا كيهدر على أنه اللي دار شي سكرة في شي بار ولا كاباريه،أو شدوه في زنقة أو شارع أو شي مكان عمومي كيما كان داير،كيخلص ما بين 150dh و 500dh،ويقدر يدوز ما بين شهر حتى لست شهور ديال الحبس. وكاين فصل آخر في القانون الجنائي كينص بلي كل محل مرخصين ليه بالاتجار فالمشروبات الكحولية ممنوع عليه يبيع للمسلمين،وإذا تشد غادي يخلص مول الرخصة غرامة مابين 300dh حتى ل 1500dh،وعقوبة حبسية ما بين شهو وست شهور.

  دابا بغيت هادو اللي معينين كْرْهُم حماة ديال العقيدة،واش النْفْسْ اللي ضارباهم على الاسلام تخليهم أسيدي يتجامعوا ويصيفطوا شي رسالة للمجلس العلمي الأعلى يسولوه باش يعطينا شي فتوى يتسدو بيها البيران والكباريهات ولحفاري ومرجان وأسيما…ومكرهتش هاد الرسالة يكتبها النهاري او الزمزمي وأبو النعيم والفيزازي والمغراوي ودوك الرباعة اللي كيبيعو الاوهام لشعب كلُّو تالف،كنأكد ليكم بانه غادي نستوردو مسؤولين من الخارج لتصريف مهام اجهزة الدولة الى حين يساليوْ دياولنا العقوبة الحبسية.

  أما بالنسبة لداك الفصل اللي كيهدر بلي الشراب ممنوع يتباع للمسلمين فهذا إقرار ضمني من الدولة بلي المغرب ساكنين فيه عدد كبير ماشي مسلم،علاه شكون معمر البيران وشكون كيستهلك هاد الكميات الكبيرة ديال الخمور؟؟؟لكن الأجهزة إلا بغات فيك الخدمة غادي تتابعك بتهمة السكر العلني ،بحال واحد خيينا كان ناشط نقابي فالتمانينات وعطاه المقدم الورقة الصفرا شحال من مرة ومسمعش عندو،حتى لواحد النهار شدوه موالين الوقت فواحد البار كان عامر سكايرية كان كيشرب فيه،اعتقلوه بوحدو وقالو ليه :ماشي حشومة انت مسلم وكتشرب حاجة محرمها سيدي ربي؟؟

  اللي كيشرب شغلو هداك واللي ما مكيشربش شغلو هداك كذلك،يقدر الاول يكون احسن من التاني. دولة لاعبة معانا جوج ورقات وبجوجهم هي اللي رابحة فيهم.

2015-10-05
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

زاوية التعليقات هي جزء مكمّل للموضوع الذي قرأته للتو. حاول أن تحصر تعليقك في صلب الموضوع حتى نستثمر هذا التعليق لكسب المزيد من الفائدة سواءً عن طريق مناقشة الموضوع أو عن طريق إضافة معلومات مكمّلة أو إبداء ملاحظات أخرى في نفس السياق.

حسيمة سيتي